YIRIK HOMILA TUG‘ILISHI VA CHANOQ TUBI FUNKSIONAL BUZILISHLARI O‘RTASIDAGI BOG‘LIQLIK

Yirik homila tug‘ilishi akusherlik amaliyotida tez-tez uchraydigan holatlardan biri bo‘lib, ona organizmida turli asoratlarning rivojlanish xavfini oshiradi. Ayniqsa, tug‘ruq jarayonida chanoq tubi mushaklari va bog‘lamalariga tushadigan ortiqcha mexanik yuklama ularning funksional holatiga salbiy ta’sir ko‘rsatishi mumkin. Ushbu maqolada yirik homila tug‘ilishi va chanoq tubi funksional buzilishlari o‘rtasidagi bog‘liqlik ilmiy adabiyotlar tahlili hamda klinik kuzatuvlar asosida yoritilgan. Tadqiqot davomida yirik homila tug‘ilishi bilan kechgan tug‘ruqlarda siydik tutolmaslik, chanoq a’zolari prolapsi, perineal shikastlanishlar hamda tug‘ruqdan keyingi reabilitatsiya ehtiyojining ortishi aniqlangan. Olingan natijalar yirik homila tug‘ilishi chanoq tubi disfunksiyasi rivojlanishida muhim xavf omili ekanligini ko‘rsatadi. Maqola xulosalari tug‘ruqni boshqarish taktikasini takomillashtirish, profilaktika va erta reabilitatsiya choralarini ishlab chiqishda muhim ahamiyatga ega.