REZBALASH DASTGOHLARIDA ADAPTIV BOSHQARUV TIZIMINING SAMARADORLIGI: VAQT TEJALISHI VA UNUMDORLIKKA TA’SIRI

Mazkur maqolada rezba qirqish dastgohlarda (RDB) qo‘llanilgan adaptiv boshqaruv tizimlarining an’anaviy boshqaruvga nisbatan samaradorligi tahlil qilinadi. Tadqiqotda vaqt sarfi va ish unumdorligi bo‘yicha taqqoslash uchun ikki turdagi boshqaruv usullarining taxminiy ma’lumotlari asosida chiziqli grafiklar tuzildi. Olingan natijalar adaptiv tizimlarning ayniqsa murakkab ishlov berish sharoitlarida katta ustunlikka ega ekanligini ko‘rsatdi.
Shuningdek, maqolada O‘zbekiston Respublikasi Prezidentining sanoatni raqamlashtirish va avtomatlashtirishga doir strategik qarashlari asosida adaptiv boshqaruv tizimlarining milliy iqtisodiyotdagi o‘rni yoritilgan. Tadqiqotda MATLAB dasturi asosida tuzilgan grafiklar orqali tizimlarning vaqt va unumdorlik bo‘yicha samaradorlik farqlari aniqlab berildi. Bunday yondashuv ishlab chiqarish texnologiyalarini zamonaviylashtirish, ishlab chiqarish jarayonlarini barqaror va samarali qilishda muhim rol o‘ynaydi.
Bundan tashqari, maqolaga yetakchi olimlar — Yoram Koren, Toshimichi Moriwaki, Yusuf Altıntas, Laszlo Monostori, Rong-Jyue Kuo va Jun Ni’ning metallga ishlov berishdagi adaptiv boshqaruv tizimlari bo‘yicha olib borgan fundamental tadqiqotlari asosida ilmiy nazariy jihatlari qo‘shildi. Yoram Korenning adaptiv boshqaruv konsepsiyasini ilk bor sanoatga joriy etganligi, Moriwaki va Monostorining intellektual va avtonom tizimlar borasidagi ishlari, Altıntasning chatterni bartaraf etish hamda real vaqtda simulyatsiya qilish metodikasi, Kuo va Ni’ning multi-sensor, fuzzy, termal kompensatsiya va smart-machine prinsiplari maqolaning nazariy poydevorini mustahkamlaydi.