ALISHER NAVOIY VA AHMAD POSHO LIRIKASIDA TASAVVUFIY RAMZ VA TIMSOLLARNING POETIK FUNKSIYASI

Sharq mumtoz adabiyotida tasavvufiy tafakkur badiiy obrazlar va ramzlar   tizimining shakllanishiga katta ta’sir ko‘rsatgan. Mumtoz shoirlar ijodida qo‘llanilgan  gul, bulbul, may, soqiy, sham’, parvona, yor, zulf, ko‘z, hijron va visol kabi obrazlar  ko‘pincha tashqi ma’nosi bilan cheklanmay, chuqur irfoniy mazmunni ham ifodalaydi.  Bunday ramzlarning asosiy xususiyati ularning ko‘pqatlamli semantik tabiatga ega  ekanligidir. Ya’ni bir obraz bir vaqtning o‘zida ham estetik, ham lirik, ham falsafiy tasavvufiy mazmunni ifodalashi mumkin.