ОРОЛБЎЙИ ҲУДУДЛАРИДА ЯШОВЧИ РЕПРОДУКТИВ ЁШДАГИ АЁЛЛАРДА СУРУНКАЛИ ВИРУСЛИ ГЕПАТИТ Вни ЎЗИГА ХОС КЕЧИШИ

Ушбу мақолада Тошкент шаҳри ҳамда Оролбўйи ҳудудларига мансуб бўлган, хусусан Урганч шаҳрида яшовчи репродуктив ёшдаги аёлларда сурункали вирусли гепатит В (СВГВ) касаллигининг клиник кечиши қиёсий таҳлил қилинган. Тадқиқотга турли ёш гуруҳларига мансуб беморлар жалб этилган бўлиб, уларда касалликнинг клиник белгилари, синдромлари ва асоратлари ўрганилди. Олинган натижаларга кўра, Урганч шаҳрида яшовчи беморларнинг ўртача ёши 38 ёшдан кичик эканлиги аниқланди. Касаллик аксарият ҳолларда (75,0%) турли хил йўлдош соматик касалликлар фонида кечиши кузатилди. Клиник жиҳатдан касаллик ўртача ва юқори фаоллик даражасида намоён бўлиб, артралгик, диспептик ва сариқлик синдромларининг устунлиги билан характерланди. Шунингдек, 28,8% ҳолатларда геморрагик синдром белгилари қўшилиши аниқланди, бу эса жигар функциясининг жиддий бузилишларини кўрсатади. Қиёсий таҳлил натижалари шуни кўрсатдики, Оролбўйи ҳудудларида яшовчи аёлларда касаллик кечиши бир қатор ўзига хос хусусиятларга эга бўлиб, бу ҳолат экологик омиллар, озиқланиш хусусиятлари ва иммунологик ҳолат билан боғлиқ бўлиши мумкин. Шунингдек, ушбу гуруҳда касалликнинг оғир кечиши ва асоратлар ривожланиш хавфи юқори эканлиги қайд этилди. Олинган натижалар сурункали вирусли гепатит В ни эрта аниқлаш, унинг клиник кечишини баҳолаш ва репродуктив ёшдаги аёлларда индивидуал даволаш тактикасини ишлаб чиқиш зарурлигини асослайди.