YOG‘-MOY SANOATINING RIVOJLANISH HOLATI VA SHAROITLARI

Yog‘-moy sanoati mamlakatimiz oziq-ovqat tarmog‘ining muhim tarkibiy qismlaridan biri bo‘lib, uning asosiy mahsuloti yuqori ijtimoiy ahamiyatga ega bo‘lgan uy xo‘jaliklarida, umumovqatlanish va sanoat korxonalarida foydalaniladigan o‘simlik moyi hamda uni keyingi qayta ishlash, shu jumladan margarin, mahsulotlari hisoblanadi. Yog‘-moy sanoatining mamlakatimiz iqtisodiyotidagi o‘rni va ahamiyati bu sanoat tarmog‘ining nafaqat aholini oziq-ovqat mahsulotlariga bo‘lgan ehtiyojini qondirishi va mamlakatimiz oziq-ovqat xavfsizligini mustahkamlashga xizmat qilishi, balki bu tarmoqning izchil va barqaror sur’atlar bilan rivojlanishi mamlakatimiz iqtisodiyotini industriallashtirish asosida yuqori qo‘shilgan qiymatga ega mahsulotlar ishlab chiqarishni mahalliylashtirish, iqtisodiy taraqqiyotni yuksaltirish evaziga uning raqobatbardoshligini ta’minlash hamda mamlakatimizning eksport salohiyatini mustahkamlashga imkon yaratishi bilan belgilanadi.