БАЧАДОН МИОМАСИНИНГ ТУРЛИ ТОПИК ВАРИАНТЛАРИДА ИММУНОГИСТОКИМЁВИЙ ТАДҚИҚОТ НАТИЖАЛАРИ

Ушбу тадқиқот бачадон миомасининг турли топик вариантлари мавжуд репродуктив ёшдаги аёлларда эндометрий тўқимасидаги эпигенетик ўзгаришларни иммуногистокимёвий баҳолашга қаратилган. Тадқиқотга бачадон миомасининг FIGO таснифи бўйича турли вариантлари мавжуд 60 нафар бемор ҳамда 15 нафар шартли соғлом аёл жалб қилинди. Беморлар FIGO 0–2 субмукоз, FIGO 3–5 интрамурал ва интрамурал-субсероз ҳамда FIGO 6–7 субсероз миома гуруҳларига ажратилди. Эндометрий без эпителийси ва стромасида DNMT1 ҳамда H3K27me3 маркерларининг экспрессияси H-score усули ёрдамида баҳоланди. Энг юқори DNMT1 экспрессияси FIGO 0–2 субмукоз миомали аёлларда, H3K27me3 экспрессиясининг энг юқори даражаси эса FIGO 3–5 интрамурал миомали беморларда, айниқса стромал компонентда аниқланди. DNMT1 юқори экспрессияси безлар архитектоникасининг бузилиши ва гиперпластик-дисрегулятор ўзгаришлар билан, H3K27me3 юқори экспрессияси эса стромал фиброз, микроангиопатия ҳамда секретор трансформация етишмовчилиги билан боғлиқ бўлди. ROC-таҳлилда DNMT1 ва H3K27me3 маркерларини биргаликда баҳолаш эндометрий морфофункционал дисрегуляциясини прогнозлашда юқори диагностик қиймат кўрсатди (AUC=0,91; сезгирлик 86,0%; спецификлик 84,0%). Олинган натижалар ушбу эпигенетик маркерлардан бачадон миомаси фонида эндометрий ҳолатини комплекс баҳолаш ва даволаш тактикасини индивидуаллаштиришда қўшимча молекуляр-морфологик мезон сифатида фойдаланиш мумкинлигини кўрсатади.