BO‘LAJAK KIMYO O‘QITUVCHILARINING KASBIY KOMPETENTLIGINI RIVOJLANTIRISH METODLARI

Mazkur tezisda kimyo o‘qituvchisini tayyorlash jarayonida kasbiy  kompetentlikni qaysi metodlar yordamida va qanday izchillikda rivojlantirish  mumkinligi haqidagi mualliflik qarashlari bayon etilgan. Biz kasbiy kompetentlikni  oltita o‘zaro bog‘liq tarkibiy qism — fan, metodik, eksperimental, raqamli,  kommunikativ-tashkiliy va refleksiv qismlar birligi sifatida ko‘rib chiqdik. Muammoli  va izlanishli ta’lim, keys-stadi, loyiha ishi, mikro-ta’lim, dars tadqiqoti, o‘quv  eksperimenti hamda portfolio har bir tarkibiy qismga qanday ta’sir etishi kimyo  kursining aniq mavzulari asosida ko‘rsatib berildi. Shuningdek, metodlarni  bakalavriatning to‘rt kursi bo‘yicha taqsimlash tartibi va erishilgan natijani aniqlash  mezonlari taklif qilindi.