XORAZMSHOH – MA’MUNIYLAR DAVRIDA SHAHARLAR TARAQQIYOTI.

O‘zbek davlatchiligi tarixida Xorazmshox-Ma’muniylar davri tarixi alohida ahamiyat kasb etadi. Bu davr shaharsozlik tarixi kam o‘rganilgan mavzulardan biri bo‘lib, bu yozma manbalar hamda arxeologik tadqiqotlar ma’lumotlarining kamligidan kelib chiqadi. Xususan, O‘zbekiston davlatchiligi tarixida Xorazmshoh – Ma’muniylar sulolasi davri shaharlarining kelib chiqishi va taraqqiyoti masalasining o‘zi juda kam o‘rganilgan. IX-XI asrlarda iqtisodiy hayot gurillab rivojlanganini yozma manbalar to‘la tasdiqlaydi. Bu albatta hududda shaharlar taraqqiyotiga ham ijobiy ta’sirini o‘tkazmay qolmaydi. Shaharlarning taraqqiyoti va ularning sonining qisqa muddatda oshishi, iqtisodiy barqarorlikni ta’minlanishi albatta o‘z o‘rnida madaniy hayotni jonlanishiga ham ulkan hissa qo‘shgan. Shu jihatdan olganda, Xorazm vohasining Xorazmshoh – Ma’muniylar davri shaharlari taraqqiyoti masalasi dolzarb muammolardan biri hisoblanib, mazkur maqola shu mavzuga bag‘ishlangan.