GERPES VIRUSI VA BU VIRUSNING INSON ORGANIZMIDA YUZAGA KELTIRADIGAN SALBIY OQIBATLARI. GERPETIK ENSEFALOPATIYALAR

Ushbu maqola gerpes virusi va uning inson organizmiga salbiy ta’sirlari haqida ma’lumot beradi. Unda oddiy gerpes virusi (HSV-1 va HSV-2)ning epidemiologiyasi, patogenezi va klinik ko‘rinishlari yoritilgan. HSV-1 asosan labial gerpesga sabab bo‘lsa, HSV-2 jinsiy yo‘l bilan yuqadi va genital gerpesni keltirib chiqaradi. Virusning latent shaklda uzoq muddat saqlanib, immunitet zaiflashganda qayta faollashuvi ta’kidlangan. Gerpes ensefaliti va meningiti kabi og‘ir asoratlar, ular tufayli yuzaga keluvchi neyrologik buzilishlar va hayot uchun xavfli bo‘lgan holatlar haqida batafsil so‘z yuritiladi. Shuningdek, PCR testi yordamida tashxislash usullari, davolashda yuqori dozalarda asiklovir qo‘llanilishi va immunitetni qo‘llab quvvatlovchi vaksinalar, jumladan, “Vitagerpavak” haqida ma’lumotlar keltirilgan. Maqola, shuningdek, gerpes virusining surunkali charchoq sindromi, sitomegalovirus, Epshteyn-Barr virusi bilan bog‘liqligi va ularning oqibatida limfoma, limfosarkoma kabi kasalliklar rivojlanishi mumkinligini yoritadi. Maqola sog‘liqni saqlash sohasidagi mutaxassislar, shuningdek, keng jamoatchilik uchun dolzarb va qiziqarli ma’lumotlarni o‘z ichiga oladi.