SOVET HUKUMATINING PAXTACHILIKNI RIVOJLANTIRISH BILAN BOG‘LIQ SIYOSATI VA UNING IJTIMOIY-IQTISODIY OQIBATLARI

Sovet hukumati mamlakat xalq xo‘jaligini boshqarishni o‘ta markazlashtirib, ma’muriy-buyruqbozlik tamoyillari asosida siyosat yuritdi. Bu siyosat jamiyatning va davlatning ijtimoiy-iqtisodiy sohalarini rivojlantirish yo‘liga to‘g‘onoq bo‘ldi. Umum davlat manfaatlarini rukach qilgan holda sovet hukumati markazlashgan iqtisodiyotni shakllantirishga shu asosda mahalliy respublikalar iqtisodiyotini markazga qaram qilib qo‘ydi.  Jumladan, O‘zbekiston iqtisodiyoti ham ushbu xatarli siyosatning ta’sirida markazning xom-ashyo manbaiga aylanib qoldi. Respublikadagi boy xom-ashyo resurslari va arzon ishchi kuchi ittifoq manfaatlariga bo‘ysundirib qaram holatga solib qo‘ydi. Ayniqsa, paxtachilikni rivojlantirish, respublikani paxta xom-ashyo bazasiga aylantirish yuzasidan maqsadli strategik dasturlar ishlab chiqildi. Sovet hukumati shu maqsaddan kelib chiqqan holda respublikada paxtachilikni rivojlantirishning bosh omili hisoblangan sug‘orish, yеrga ishlov berish va parvarish qilish yuzasidan  alohida direktiv ko‘rsatmalar ishlab chiqildi.