DENTAL IMPLANTATSIYADAN KEYIN PERI-IMPLANT YUMSHOQ VA QATTIQ TO‘QIMALARDA PATOLOGIK O‘ZGARISHLARNI KLINIK VA RADIOLOGIK PREDIKTORLAR ASOSIDA INDIVIDUAL PROGNOZLASH

Dental implantatsiyaning uzoq muddatli muvaffaqiyati peri-implant yumshoq to‘qimalar barqarorligi va marginal suyak darajasining saqlanishiga bog‘liq. Mazkur tahliliy maqolaning maqsadi peri-implant mukozit va peri-implantit rivojlanishini erta prognozlashda klinik hamda radiologik prediktorlarning amaliy ahamiyatini tizimlashtirishdir. 15 ta xalqaro manba tahlili shuni ko‘rsatdiki, zondlashda qonash, zondlash chuqurligining vaqt bo‘yicha ortishi, suppuratsiya, bazal rentgenogrammaga nisbatan progressiv marginal suyak yo‘qotilishi, avvalgi periodontit, chekish, qandli diabet, muntazam profilaktik kuzatuvning yo‘qligi, protezning noqulay chiqish burchagi va qavariq konturi, qoldiq sement hamda keratinlashgan shilliq qavat yetishmovchiligi individual xavfni aniqlashda muhim omillardir. Prognozlash bir martalik ko‘rsatkichga emas, boshlang‘ich klinik-radiologik bazaga nisbatan dinamik o‘zgarishga tayanishi lozim. Taklif etilgan ko‘p omilli yondashuv bemorni past, o‘rta va yuqori xavf guruhlariga ajratish va monitoring intervalini individuallashtirish imkonini beradi.