ЯНГИ ДАВР ҲИНДИ АДАБИЁТИ ВА УНИНГ АСОСИЙ ВАКИЛЛАРИ: КАМЛЕШВАР, МОХАН РАКЕШ ВА РАЖЕНДРА ЯДАВ

Ушбу мақолада ХХ асрнинг иккинчи ярмида Ҳиндистонда вужудга келган “Найи Каҳани” деб номланган адабий оқимнинг шаклланиш жараёнлари, унинг ижтимоий, маданий ва сиёсий асослари атрофлича таҳлил қилинади. Ҳаракатнинг юзага келишига сабаб бўлган мустамлакачиликдан кейинги жамиятдаги мураккаб ўзгаришлар, шунингдек, инсоннинг ички дунёсини таҳлил қилишга қаратилган янги бадиий тамойиллар ёритилади. Мақола Камлешвар, Моҳан Ракеш ва Ражендра Ядав ижодининг ўзига хос жиҳатларини кўрсатиб, уларнинг янги адабий тафаккур шаклланишидаги ҳиссасини шарҳлайди. Айниқса, “Найи Каҳани”  адабиётида шахс ва жамият ўртасидаги зиддиятларнинг  тасвирланиши, психологик модернизмнинг кучайиши, оила институтининг емирилиши ва шахслардаги янги маънавий изланишлар масалаларига алоҳида эътибор қаратилади. Тадқиқот натижалари Ҳиндистон насрида юз берган модерн адабий жараёнларнинг моҳиятини очиб беришга хизмат қилади.