O‘ZBEKISTONDA EKSPORT TARKIBINI DIVERSIFIKATSIYALASHNING IQTISODIY O‘SISH VA TASHQI SAVDO BARQARORLIGIGA TA’SIRI

Mazkur tezisda O‘zbekistonda eksport tarkibini diversifikatsiyalashning  iqtisodiy o‘sish va tashqi savdo barqarorligini ta’minlashdagi ahamiyati o‘rganilgan.  Eksportning ayrim xomashyo mahsulotlari va cheklangan tashqi bozorlarga bog‘liqligi  mamlakat iqtisodiyotining jahon bozoridagi narxlar o‘zgarishi, tashqi talabning  pasayishi va global iqtisodiy xavflarga nisbatan zaifligini oshirishi asoslab berilgan.  Tadqiqotda yuqori qo‘shilgan qiymatli sanoat mahsulotlari, tayyor oziq-ovqat  mahsulotlari, to‘qimachilik, farmatsevtika, elektrotexnika hamda xizmatlar eksportini  rivojlantirishning iqtisodiy samaralari yoritilgan. Shuningdek, eksport geografiyasini  kengaytirish, eksportchi korxonalarni moliyaviy qo‘llab-quvvatlash, xalqaro  standartlarni joriy etish va transport-logistika infratuzilmasini takomillashtirish  masalalari tahlil qilingan. Tadqiqot natijasida eksport tarkibini diversifikatsiyalash  valyuta tushumlarini barqarorlashtirish, tashqi savdo saldosini yaxshilash, yangi ish  o‘rinlarini yaratish va uzoq muddatli iqtisodiy o‘sishni ta’minlashga xizmat qilishi  aniqlangan.