INGICHKA TOLALI G‘O‘ZAGA OKSIGUMAT STIMULYATORINI QO‘LLASHNING O‘SISHI, RIVOJLANISHI VA PAXTA HOSILIGA TA’SIRI

O‘simlikning o‘sishi asosan uning massasi oshishidan va poya, barg, ildiz kabi vegetativ organlarning takror vujudga kelishidan iborat bo‘ladi. Bu organlarning asosiy vazifasi o‘simliklarda organik moddalar to‘plash va reproduktiv organlar hosil bo‘lishi uchun sharoit yaratish hisoblanadi. Rivojlanish jarayonida esa o‘simliklar tanasida birin-ketin kechadigan sifatiy o‘zgarishlar sodir bo‘ladi. Lekin o‘simliklar vegetatsiya davrida hamma vaqt ham o‘sish tezligi bir meyorda bo‘lmaydi, chunki ichki va tashqi sharoit omillarining ta’siri natijasida o‘zgarib turadi. O‘simliklarning o‘sishiga tashqi sharoitning juda ko‘p omillari ta’sir etadi. Chunki, o‘simliklarning yaxshi o‘sishi uchun yetarli darajada harorat, yorug‘lik, namlik, gazlar tarkibi, mineral oziqlanish va boshqalar talab etiladi.