ЎҚУВЧИЛАРГА ЭСТЕТИК ТАРБИЯ БЕРИШДА ЎЗБЕК МУСИҚА ФОЛЬКЛОРИНИНГ АҲАМИЯТИ

Ўзбек миллий мусиқа санъатининг зарҳал саҳифаларини варақлар эканмиз, улар негизидаги мантиқий баркамоллик, бетакрор оҳанг ва усул жилоларининг нозик жиҳатларни эътироф этмасликнинг иложи йўқ. Ушбу қадриятларни кенг ва атрофлича илмий ўрганиш, таҳлил этиш, ўзлаштириш ва тегишли хулосалар чиқариш тадқиқотчилар олдидаги долзарб вазифа эканлигини қайд қилишимиз керак. Ўзбек мусиқа фольклори асосида ўқувчиларни эстетик тарбиялаш ҳозирги куннинг долзарб муаммоларданбирига айланди. Чунки, ўзбек мусиқа фольклори миллатнинг маънавий-мусиқий бойлиги ҳисобланиши билан бирга унинг мазмунида миллий урф-одат ва анъаналар, миллий менталитет ўз ифодасини топган. Ўзбек мусиқа фольклори ўзининг ўйноқилиги ва жўшқинлигига кўра ўқувчиларни эстетик тарбиялашда муҳим дидактик восита саналанади. Шунинг учун ҳам умумий ўрта таълим мактабларида “Мусиқа маданияти” ўқув фани жараёнида Ўзбек мусиқа фольклорини ўрганиш ўқувчиларнинг санъат асарларини ҳис этиш, улардан маънавий завқ олиш, гўзалликка интилиш каби хислатларининг шаклланишида алоҳида аҳамиятга эга.