ASEPTIK NEKROZNI BIRINCHI BOSQICHDA TO’XTATISH BO’YICHA YANGI KLINIK PROTOKOLLAR

Son suyagi boshining avaskulyar nekrozi ortopediyada dolzarb muammolardan biri bo‘lib, davolash usullari konservativ choralaridan tortib invaziv jarrohlik aralashuvlarigacha bo‘lgan keng spektrni o‘z ichiga oladi. Davolash taktikasi bemorning yoshi, klinik belgilarining og‘irlik darajasi, nekroz o‘chog‘ining joylashuvi va hajmi, shuningdek bo‘g‘im yuzasidagi yemirilish bosqichiga qarab individual ravishda tanlanadi. Yemirilishdan oldingi bosqichlarda konservativ muolajalar — jismoniy terapiya, yuklamani cheklash, zararli omillarni bartaraf etish hamda farmakologik vositalar qo‘llanilishi mumkin. Biroq ushbu usullarning samaradorligi bo‘yicha yagona klinik standart mavjud emas. Kichik o‘choqlar ba’zan asemptomatik kechsa-da, aksariyat hollarda kasallik rivojlanib, jarrohlik davolashni talab qiladi. O‘rta va katta o‘lchamdagi yemirilishlarda yadro dekompressiyasi, suyak transplantatsiyasi va osteotomiya samarali hisoblanadi, og‘ir holatlarda esa endoprotezlash qo‘llaniladi. Erta bosqichda to‘g‘ri tanlangan davolash nekroz rivojlanishini sekinlashtirib, bo‘g‘im funksiyasini saqlab qolish imkonini beradi.