Il23r ва il17f генлари полиморфизмларининг вульгар псориаз кечиши оғирлиги билан боғлиқлиги ва прогностик аҳамияти

IL23R (rs11209026) ва IL17F (C/G, rs763780) генлари полиморфизмларининг вульгар псориаз кечиши оғирлиги билан боғлиқлигини ва прогностик аҳамиятини баҳолаш ўтказилиб, 98 нафар бемор касаллик оғирлиги бўйича уч гуруҳга ажратилди: енгил (n=38), ўрта оғир (n=32) ва оғир (n=28) даража. Назорат гуруҳини 95 нафар соғлом шахс ташкил этди. Аллел ва генотип частоталари χ² ва Фишер мезонлари билан солиштирилди; тенденция Кокрен–Армитаж мезони билан баҳоланди. Олинган натижалар бўйича иккала локусда ҳам минор аллел частотаси назоратдан енгил, ўрта оғир ва оғир даражага қараб изчил ошиб борди (тенденция: IL23R — p=0,002; IL17F — p<0,001). Оғир даражада IL23R A аллели 10,7% (OR=11,28; 95% ИО 2,21–57,60; p=0,0003), IL17F G аллели 30,4% (OR=6,47; 2,86–14,63; p<0,001) ни ташкил этди, енгил ва ўрта оғир даражаларда эса фарқ ишончли бўлмади. Беморлар гуруҳи ичида солиштирганда (оғир даражага қарши енгил+ўрта оғир) фақат IL17F бўйича ишончли фарқ сақланди (OR=2,78; 1,31–5,86; p=0,006). Хулоса: IL17F C/G полиморфизми вульгар псориазнинг оғир кечиши билан боғланган ва кечишни башорат қилишда қўшимча аҳамиятга эга бўлиши мумкин; IL23R бўйича боғлиқлик асосан соғлом шахслар билан солиштирганда намоён бўлади.